Shqiptari Pano Ruçi, i cili tre vite më parë humbi djalin e tij 21-vjeçar në aksidentin hekurudhor të Tempit në Greqi dhe u bë i njohur për grevën e tij trejavore për drejtësi para parlamentit, pësoi një humbje të ndjenjave gjatë një seance të tensionuar gjyqësore dhe u transportua në spital.
Sipas mediave greke, ai ndodhet aktualisht në Spitalin Universitar të Larisës, pas transportimit me ambulancë nga kompleksi “Gaiopolis”, ku po vazhdon gjyqi lidhur me aksidentin hekurudhor. Presidenti i POEDIN, Michalis Giannakos, bëri të ditur se Ruçi (Panos Routsis) ka pësuar një episod të fikjes dhe është nxjerrë nga salla e gjyqit.
Ai po monitorohet nga mjekët dhe ndodhet në gjendje të mirë shëndetësore.
Ndërkaq, avokatja e tij mbrojtëse, Zoe Konstantopoulou, e ka akuzuar policinë si përgjegjëse për situatën, duke pretenduar se Ruçi u dhunua nga gjashtë oficerë. Ajo deklaroi se nuk iu lejohej asaj dhe familjarëve të afroheshin pranë tij në sallën e gjyqit dhe se shqiptari u godit nga policia.
“Është e paimagjinueshme. Më vjen shumë keq, më shihni të shqetësuar, sepse mua dhe prindërve të mi u ushtrua dhunë. Mirela Ruçi u pengua të më afrohej në sallën e gjyqit, ndërsa unë u pengova gjithashtu, me urdhër të gjykatës, t’i afrohesha. Panos Routsis u dhunua nga gjashtë oficerë policie, të cilët e rrahën”, tha ajo, ndër të tjera.
Michalis Giannakos konfirmoi gjithashtu se Ruçi u dërgua në Spitalin Universitar të Larisës pas humbjes së ndjenjave dhe po mbikëqyret në Njësinë e Kujdesit Afatshkurtër nga kardiologët.
“Drejtësia duhet të vendoset”, tha ai, duke theksuar rëndësinë e procesit gjyqësor.
