Sot përkujtohet me dhimbje një nga ngjarjet më tragjike të luftës në Kosovë, masakra e lagjes Qerim në Gjakovë, e ndodhur natën mes 1 dhe 2 prillit 1999. Forcat serbe vranë mizorisht 21 gra dhe fëmijë, duke lënë pas një plagë të thellë në kujtesën e familjarëve dhe të gjithë shqiptarëve. Kjo masakër mbetet simbol i vuajtjeve dhe sakrificave të popullit të Kosovës në rrugën drejt lirisë.
I mbijetuari i vetëm, Dren Caka, atëherë vetëm 10 vjeç, arriti të shpëtojë në mënyrë të pabesueshme duke u fshehur mes trupave të pajetë dhe duke u shtirur si i vdekur. Ai më vonë dëshmoi përpara Tribunalit të Hagës, duke rrëfyer tmerrin e asaj nate kur gratë dhe fëmijët u nxorën nga bodrumi dhe u ekzekutuan pa mëshirë, ndërsa shtëpia u dogj mbi ta.
Sot, 27 vite më pas, kjo ngjarje përkujtohet si një thirrje për drejtësi dhe kujtesë. Masakra e Qerimit mbetet një plagë e hapur, por edhe një dëshmi e qëndresës dhe forcës për të mos harruar kurrë ata që humbën jetën. Kujtimi i tyre jeton si një amanet për brezat, që historia të mos përsëritet më kurrë.
