Në jug të Francës, fermerët e qershive po përdorin një metodë sa të vjetër, aq edhe dramatike për të mbrojtur prodhimin e tyre: ndezin zjarr poshtë pemëve gjatë natës për t’i shpëtuar nga ngricat e papritura.
Kur temperaturat bien ndjeshëm gjatë orëve të vona, mjafton edhe një ngricë e lehtë për të shkatërruar të gjithë lulëzimin e pemëve, duke rrezikuar muaj të tërë pune dhe investimi.
Për të shmangur humbjen totale të prodhimit, fermerët vendosin vatra zjarri mes rreshtave të pemëve. Flakët krijojnë një shtresë të hollë ajri më të ngrohtë rreth luleve të qershive, duke i mbrojtur ato nga i ftohti që mund t’i dëmtojë brenda pak orësh.
Kjo është një teknikë tradicionale, e përdorur prej vitesh në zonat bujqësore, por mbetet një metodë e kushtueshme, e lodhshme dhe jo pa rrezik. Megjithatë, për shumë fermerë, është e vetmja mënyrë për të shpëtuar sezonin.
Një sezon i brishtë, i mbrojtur nga zjarri, dhe një pamje që duket si skenë filmi.
