Pamjet e publikuara së fundmi nga sulmet me raketa të lëshuara nga Irani drejt Izraelit kanë tërhequr vëmendjen e analistëve ushtarakë, për shkak të mënyrës së pazakontë të lëvizjes së tyre në ajër.
Në videot që po qarkullojnë, disa prej raketave nuk ndjekin trajektoren klasike balistike (një hark i parashikueshëm), por shfaqin devijime dhe ndryshime drejtimi në fazën finale të fluturimit, pak sekonda para goditjes.
Sipas ekspertëve të mbrojtjes, kjo lidhet me përdorimin e të ashtuquajturës teknologji MaRV (Maneuverable Reentry Vehicle), një sistem që lejon kokën luftarake të raketës të manovrojë pasi rikthehet në atmosferë.
Ndryshe nga raketat balistike tradicionale, të cilat ndjekin një rrugë të paracaktuar që nga momenti i lëshimit, raketat me MaRV mund të ndryshojnë drejtim në fazën e fundit. Kjo realizohet përmes elementeve korrigjuese si “fins” (krahë të vegjël) ose motorë të vegjël shtesë që bëjnë rregullime të shpejta të trajektores.
Kjo sjell dy pasoja kryesore.
-Vështirëson ndërhyrjen e mbrojtjes ajrore, pasi sistemet kundërraketore bazohen në parashikimin e trajektores. -Rrit saktësinë e goditjes, duke lejuar korrigjime në momentet e fundit.
Sipas burimeve të hapura dhe analizave ndërkombëtare, Irani ka zhvilluar disa modele raketash që pretendohet se përfshijnë elementë të tillë manovrimi.
Ndër to përmenden shpesh:
-Fattah-1 dhe Fattah-2, të cilat nga Irani cilësohen si raketa “hipersonike”, megjithëse këto pretendime debatohen në qarqet ushtarake ndërkombëtare.
-Kheibar Shekan, një raketë balistike me rreze të mesme, e projektuar për të depërtuar sistemet mbrojtëse, përmes ndarjes së kokës luftarake dhe manovrimit në fazën përfundimtare.
Sisteme si “Iron Dome”, “David’s Sling” apo “Arrow” janë ndërtuar për të interceptuar raketa që ndjekin trajektore të parashikueshme. Kur një objekt ndryshon drejtim në momentet e fundit, koha për reagim dhe llogaritje zvogëlohet ndjeshëm.
Pamjet nuk janë vetëm një moment i një sulmi, por një ilustrim i zhvillimit të teknologjisë ushtarake moderne, ku raketat po bëhen gjithnjë e më të avancuara, ndërsa sistemet mbrojtëse përpiqen të përshtaten me këto ndryshime.
