Pamje të pazakonta janë regjistruar në Australinë Perëndimore, ku qielli është kthyer në një ngjyrë të kuqe të errët si pasojë e ciklonit tropikal 'Narelle'.
Banorët raportojnë se re të dendura pluhuri kanë mbuluar zonën, duke bllokuar dritën e diellit dhe duke krijuar një atmosferë të pazakontë, thuajse “apokaliptike”. Drita e ditës është zbehur ndjeshëm, ajri është rënduar, ndërsa shikueshmëria ka rënë pothuajse në zero në disa zona.
Pamjet e shpërndara në rrjete sociale tregojnë qytete të tëra të zhytura në një mjegull të kuqe dhe portokalli, një fenomen që ka alarmuar dhe njëkohësisht ka habitur banorët lokalë.
Në disa qytete, erërat e forta të shkaktuara nga cikloni kanë shkaktuar dëme të konsiderueshme materiale. Raportohet për çati të shkulura, ndërtesa të dëmtuara dhe ndërprerje të energjisë elektrike dhe furnizimit me ujë.
Fenomeni ndodh kur erërat e fuqishme të ciklonit marrin me vete sasi të mëdha pluhuri nga zonat e thata dhe i shpërndajnë në ajër, duke krijuar këtë efekt dramatik në qiell.
Ndërkohë, autoritetet kanë bërë thirrje për kujdes maksimal, ndërsa cikloni Narelle, i cili më vonë është dobësuar në një stuhi subtropikale, vijon të ndikojë në rajon, duke sjellë kushte të vështira atmosferike dhe rrezik për banorët.
