Një rikthim i pazakontë i dimrit në mes të pranverës ka sjellë reshje dëbore në jug të vendit, duke shkaktuar probleme në qarkullimin rrugor. Dëbora që ka rënë në zonën e Skërficës ka bllokuar aksin drejt tunelit, duke krijuar vështirësi për drejtuesit e mjeteve.
Segmenti pranë Tunelit të Kardhiqit është ndër më të prekurit, ku trashësia e borës dhe temperaturat e ulëta kanë bërë që rruga të bëhet e rrëshqitshme dhe në disa raste e pakalueshme. Automjete të shumta janë detyruar të ndalojnë, ndërsa disa drejtues kanë mbetur të bllokuar përkohësisht teksa presin një ndërhyrje të menjëhershme për të vazhduar qarkullimin.
Edhe pse problematike për qarkullimin, dëbora e pranverës ka krijuar një kontrast të rrallë natyror, duke mbuluar peizazhin me të bardhë në një periudhë kur zakonisht mbizotëron gjelbërimi.
