Marrëdhëniet sociale të mbushura me tension dhe konflikt mund të përshpejtojnë ndjeshëm procesin e plakjes së organizmit. Përplasjet e vazhdueshme, debatet dhe raportet negative nuk ndikojnë vetëm në gjendjen emocionale, por veprojnë drejtpërdrejt në nivel qelizor, duke dëmtuar shëndetin e zemrës dhe duke dobësuar sistemin imunitar.
Njerëzit që na shkaktojnë stres apo na vështirësojnë përditshmërinë nuk prekin vetëm humorin tonë. Ndërsa përfitimet e marrëdhënieve të shëndetshme janë studiuar gjerësisht, më pak vëmendje i është kushtuar anës tjetër: efekteve që kanë individët që krijojnë tensione dhe konflikte të vazhdueshme, të njohur si “grindavecë”.
Një studim i fundit, i publikuar në revistën e Akademisë Amerikane të Shkencave, tregon se prania e këtyre personave lë pasoja të matshme biologjike në organizëm. Nga analiza e rreth 2 mijë pjesëmarrësve, rezultoi se 30% e tyre kishin të paktën dy persona në jetën e përditshme që u shkaktonin stres, qoftë në familje, në punë apo në rrethin shoqëror.
Sipas gjetjeve, çdo marrëdhënie konfliktuale shtesë lidhet me një përshpejtim të plakjes biologjike me rreth 9 muaj. Kjo do të thotë se marrëdhëniet negative mund të kenë efekte të krahasueshme me stresin kronik, duke ndikuar në mënyrë të drejtpërdrejtë në shëndetin dhe mirëqenien e përgjithshme.
