Hamdi Lataj, një 62-vjeçar me origjinë nga Kosova, është vendosur në fokusin e mediave pas paraqitjes në videoklipin e reperit të njohur Drake, ndërsa e kaluara e tij përfshin dënime dhe hetime për lidhje me krimin e organizuar.
Sipas dokumenteve gjyqësore në Shtetet e Bashkuara, Lataj është dënuar për komplot për grabitje banke dhe ka vuajtur një dënim prej dy vitesh burg. Ai u arrestua pasi grupi ku bënte pjesë tentoi të grabiste një bankë në Brooklyn duke hyrë nga çatia, ndërsa Lataj u kap duke u larguar me një automjet Cadillac.
Në Kanada, ai nuk ka precedent penal, por emri i tij është përmendur në disa hetime.
Një dosje hetimore e mëhershme sugjeron se ai dyshohej për përfshirje në trafik droge në bashkëpunim me Joaquín “El Chapo” Guzmán, megjithëse nuk u ngritën akuza.
Në një hetim më të fundit, Lataj është vënë nën vëzhgim në kuadër të një çështjeje për lojëra të paligjshme fati dhe pastrim parash, ku përmenden edhe grupi Hells Angels dhe persona të dyshuar si pjesë e mafias italiane ‘Ndrangheta në zonën e Torontos. As në këto raste nuk rezulton të jetë akuzuar zyrtarisht.
Paralelisht me këtë të kaluar, Lataj duket se jeton një jetë luksoze në Toronto, ku ka deklaruar adresë në një nga kullat më ekskluzive të qytetit. Ai është parë shpesh në ndeshjet e Toronto Raptors nga vendet pranë parketit dhe shfaqet në videoklipin e vitit 2023 të këngës “Polar Opposites”, ku shihet duke biseduar me Drake në një ambient që i ngjan një salle bixhozi.
Megjithatë, nuk ka prova që tregojnë për një marrëdhënie të afërt mes tij dhe artistit.
Pamje të publikuara ndër vite e tregojnë Latajn edhe pranë automjeteve luksoze si Range Rover dhe Porsche GT2RS, ndërsa në fotografi nga viti 2019 ai shihet pranë ish-yllit të Raptors, Kyle Lowry, duke festuar fitoren e ekipit në Konferencën Lindore të NBA.
Figura e tij mbetet e diskutueshme, duke ndërthurur një të kaluar problematike me një prani të dukshme në jetën publike dhe në skenën e argëtimit.
