Një artikull i publikuar nga The Telegraph hedh dritë mbi një fenomen në rritje në Mbretërinë e Bashkuar, ku disa shtetas shqiptarë të përfshirë në trafikun e drogës po pretendojnë se janë viktima të “skllavërisë moderne” për të shmangur dëbimin.
Sipas raportimit, këta persona kanë paraqitur ankesa në gjykatat e emigracionit, duke argumentuar se janë detyruar nga grupe kriminale të kryejnë veprat penale dhe se kthimi në Shqipëri do t’i rrezikonte.
Në dy rastet më të fundit, gjykatat e larta të emigracionit kanë vendosur që çështjet të rishqyrtohen, pasi kanë konstatuar “gabime ligjore” në vendimet e mëparshme. Si pasojë, të dy personat kanë arritur të qëndrojnë përkohësisht në Britani.
Ndërkohë, ministrja e Brendshme britanike, Shabana Mahmood, ka paralajmëruar një valë dëbimesh për mijëra emigrantë të paligjshëm dhe persona me precedentë penalë, përpara se ata të kenë mundësi të përdorin ligjet për të drejtat e njeriut për të bllokuar largimin.
Autoritetet britanike kanë identifikuar 25 vende të konsideruara “të sigurta”, mes tyre edhe Shqipëria, drejt të cilave synohet dëbimi i menjëhershëm i azilkërkuesve të refuzuar dhe kriminelëve.
Po ashtu, qeveria planifikon ndryshime në ligjet për skllavërinë moderne, për të shmangur pretendimet e bëra në momentet e fundit. Sipas planit, emigrantët do të duhet të paraqesin këto pretendime menjëherë pas mbërritjes në Britani dhe jo më vonë.
Sipas të dhënave, shqiptarët renditen si kombësia e katërt më e shpeshtë që pretendojnë se janë viktima të skllavërisë moderne, me rreth 2,000 raste të regjistruara vitin e kaluar. Para tyre renditen shtetasit britanikë, eritreanët dhe vietnamezët.
Dokumentet gjyqësore tregojnë rastin e një 30-vjeçari shqiptar, i cili arriti të shmangë dëbimin pasi pretendoi se kishte qenë viktimë e trafikimit. Ai ishte larguar nga Shqipëria në vitin 2014 dhe kishte kaluar disa vite në Francë dhe Belgjikë, duke punuar për një grup kriminal, përpara se të dërgohej në Britani për të punuar në një “shtëpi kanabisi”.
Pas arrestimit, ai deklaroi se ishte detyruar të punonte kundër vullnetit të tij dhe se kishte frikë për jetën nëse kthehej në Shqipëri, për shkak të borxheve ndaj personave që e kishin trafikuar.
Edhe pse Ministria e Brendshme britanike pranoi se ai mund të kishte qenë viktimë, kërkesa për azil u refuzua fillimisht, duke vënë në dyshim besueshmërinë e tij, pasi nuk kishte kërkuar azil në Francë apo Belgjikë. Megjithatë, ai fitoi apelimin, pasi gjykata vlerësoi se pretendimet e tij nuk ishin shqyrtuar siç duhet.
Në një rast tjetër, një shqiptar që kishte hyrë në Britani në moshën 17-vjeçare u dënua për posedim kokaine me qëllim shpërndarjen, dokumente false dhe drejtim automjeti pa siguracion. Ai u dënua me 40 muaj burg.
Edhe ky person pretendoi se ishte viktimë e skllavërisë moderne dhe se rrezikonte hakmarrje nëse kthehej në Shqipëri. Edhe pse kërkesat e tij u refuzuan fillimisht, çështja u rikthye për rishqyrtim për shkak të gabimeve në vendimet e mëparshme.
Sipas The Telegraph, këto raste po ngrenë pikëpyetje mbi mënyrën se si ligjet për të drejtat e njeriut dhe skllavërinë moderne po përdoren nga disa emigrantë për të vonuar ose shmangur dëbimin nga Mbretëria e Bashkuar.
