Një njoftim i papritur ka tronditur gazetarin e njohur Ilir Babaramo, drejtues i emisionit “5 Pyetjet nga Babaramo”. Ky i fundit është njoftuar nga shefi i tij për ndërprerjen e menjëhershme të bashkëpunimit me televizionin Report TV.
Vendimi, i cili ka ardhur direkt nga shefi i Babaramos Carlo Bollino, duket se ka pasur si pikënisje qëndrimet editoriale të gazetarit në raport me pushtetin ekzekutiv.
Sipas dëshmisë së vetë Babaramos, komunikimi i shkarkimit nuk ka ndjekur rrugët zyrtare administrative, por është bërë përmes një telefonate në orët e vona të natës. Gazetari rrëfen se arsyeja kryesore e artikuluar nga pronari i medias ishte linja kritike e emisionit ndaj qeverisë.
“Dje në orët e vona të mbrëmjes, pronari i televizionit më ka telefonuar për të më komunikuar pushimin nga puna. ‘Nuk pranoj që të punosh për mua dhe të kritikosh qeverinë’,-kjo ishte fjalia që përsëriste pa pushim,” deklaron Babaramo mbi bisedën me Bollinon.
