Ardita Gashi, 31-vjeçarja e dyshuara për vrasjen e dyfishtë në Majac të Podujevës, ka ndërruar jetë në QKUK, pas vetplagosjes që kreu mbrëmë. Vdekja e saj shënon një fund tragjik të një ngjarjeje që tronditi komunitetin.
Ngjarja ndodhi të dielën, kur Ardita dyshohet se e ftoi në banesë dhe më pas vrau të dashurin e saj, 45-vjeçarin nga Obiliqi, pas përkeqësimit të marrëdhënies së tyre që po shkonte drejt ndarjes. Më pas, në vendngjarje mbërriti edhe një familjare e saj, Miradije Gashi, e cila u plagos rëndë dhe ndërroi jetë në spital pavarësisht ndërhyrjes mjekësore.
Pas të shtënave, Ardita u dërgua për trajtim mjekësor, por gjendja e saj ishte kritike dhe mëngjesin e sotëm konfirmohet vdekja e saj. Me urdhër të Prokurorisë, rasti është riklasifikuar si “Vrasje e rëndë” dhe “Mbajtje e paautorizuar e armëve”, ndërsa hetimet për zbardhjen e plotë të ngjarjes vazhdojnë.
