Teherani ka paraqitur gjashtë kushte për uljen e tensioneve me Shtetet e Bashkuara dhe Izraelin, në një moment kur retorika mes palëve është ashpërsuar ndjeshëm. Nga ana tjetër, Donald Trump ka kërkuar hapjen e Ngushticës së Hormuzit brenda 48 orëve, duke paralajmëruar se në të kundërt SHBA mund të ndërmarrin sulme ndaj termocentraleve iraniane.
Reagimi i ushtrisë iraniane ka qenë i menjëhershëm dhe i drejtpërdrejtë. Një zëdhënës ushtarak deklaroi për agjencinë Fars se Teherani është i gatshëm të godasë infrastrukturën energjetike dhe atë të teknologjisë së informacionit të Shteteve të Bashkuara. Ndërkohë, përfaqësuesi i Iranit në OKB, Ali Mousavi, theksoi se Ngushtica e Hormuzit mbetet e mbyllur vetëm për armiqtë e Iranit.
Sipas agjencisë Tasnim, e lidhur me Gardën Revolucionare Islamike, kushtet e vendosura nga Teherani për përfundimin e konfliktit përfshijnë: garanci që përplasjet nuk do të përsëriten, mbylljen e bazave ushtarake amerikane në rajon, kompensime financiare për Iranin, ndalimin e operacioneve kundër grupeve rajonale të afërta me Teheranin, vendosjen e një kuadri të ri ligjor për Ngushticën e Hormuzit, si dhe ndjekjen penale të mediave që konsiderohen anti-iraniane.
