Një aksident tragjik në punë i ka marrë jetën një 53-vjeçari shqiptar në Modena, Itali.
Viktima është Murat Tafçiu, baba i katër fëmijëve, i cili humbi jetën gjatë një pune ndërtimi në qendër të qytetit.
Ngjarja ka shkaktuar dhimbje të madhe te familjarët, të cilët mbërritën menjëherë në vendin e aksidentit. Vajza e tij, mes lotësh dhe dënesash, nuk reshti së thirruri për të atin, në një skenë rrëqethëse që preku të pranishmit. Tragjedia bëhet edhe më e rëndë për shkak se ndodhi në Ditën e Babait.
“Babi im, babi im! Jo, nuk është e mundur, nuk është e mundur…”, tha vajza e shqiptarit mes lotëve.
Ngjarja e rëndë ndodhi mëngjesin e djeshëm, rreth orës 08:45, në një kantier ndërtimi pranë Corso Canalgrande, në një godinë historike ku po kryheshin punime rikonstruksioni. Tafçiu, i cili jetonte prej vitesh në Cavezzo, ishte duke punuar në skelë, rreth dy metra mbi tokë, kur një pjesë e rëndë e strukturës u shkëput papritur dhe ra mbi të.
Si pasojë e goditjes, ai humbi ekuilibrin dhe u rrëzua, duke pësuar dëmtime të rënda në kokë. Edhe pse lartësia nuk ishte e madhe, plagët rezultuan fatale. Ai humbi ndjenjat menjëherë, ndërsa kolegët njoftuan urgjencën.
Në vendngjarje mbërritën ekipet mjekësore, por përpjekjet për ta rikthyer në jetë nuk patën sukses. Vdekja e tij u konfirmua rreth orës 09:30.
Autoritetet italiane, së bashku me strukturat shëndetësore, nisën hetimet për të zbardhur plotësisht rrethanat e aksidentit.
Sipas të dhënave paraprake, nuk dyshohet për përfshirje të personave të tjerë, ndërsa shkaku kryesor mendohet të jetë shembja e papritur e një pjese të skelës. Megjithatë, po verifikohet nëse janë respektuar të gjitha standardet e sigurisë në punë.
Pas përfundimit të veprimeve hetimore, trupi i pajetë u dërgua për ekzaminime të mëtejshme mjeko-ligjore, ndërsa familja e tij përballet tashmë me një humbje të rëndë dhe të papritur.
Ndërkohë tragjedia bëhet edhe më e rëndë për shkak se ndodhi në Ditën e Babait.
