Në dukje, një ndalim rutinë nga policia rrugore në Maminas. Një automjet në shkelje, një kontroll i zakonshëm, asgjë që nuk ndodh çdo ditë. Por ajo që pason e nxjerr situatën nga normaliteti dhe e fut në një realitet që, fatkeqësisht, nuk është aspak i panjohur.
Në vend që të ndiqej procedura ligjore dhe të vendosej gjoba përkatëse, gjithçka është mbyllur me një “zgjidhje të shpejtë”: 20 mijë lekë ryshfet dhe drejtuesi i mjetit është lënë i lirë të vazhdojë rrugën, pa asnjë pasojë.
Nuk ka procesverbal. Nuk ka gjobë. Nuk ka përgjegjësi. Ka vetëm një marrëveshje të heshtur që zgjat pak sekonda, por që thotë shumë për mënyrën se si trajtohet ligji në praktikë.
Këtu nuk bëhet më fjalë për një individ që “gaboi”. Kjo është një sjellje që duket e zakonshme, pothuajse rutinë. Sepse askush nuk negocion ligjin për herë të parë me aq qetësi. Dhe kjo e bën edhe më të rëndë situatën: nuk kemi të bëjmë me një devijim të rastësishëm, por me një mentalitet të rrënjosur.
Ironia është e hidhur: policia ndalon qytetarët për shkelje, por në fund shkel vetë ligjin duke e kthyer atë në mall pazari. Në vend që të ndëshkojë shkelësin, e kthen në “klient”.
Ndërkohë, qytetarëve u kërkohet korrektësi dhe respektim rigoroz i rregullave. Por çfarë vlere kanë këto, kur vetë ligji ka një çmim të padeklaruar?
