Një 20-vjeçar shqiptar është arrestuar në aeroportin e Brukselit pasi në valixhen e tij u gjetën 22.5 kilogramë kanabis, të ndara në 19 pako. I riu kishte mbërritur me avion nga Bangkoku i Tajlandës, një nga linjat që monitorohen më shpesh nga autoritetet doganore për shkak të trafikut të drogës.
Sipas prokurorisë, kontrolli i valixhes u bë menjëherë pas mbërritjes së tij në aeroport. Gjatë verifikimit, doganierët zbuluan paketat me kanabis të fshehura në bagazh.
Para gjykatës, 20-vjeçari pretendoi se nuk e dinte se në valixhe kishte drogë, duke thënë se kishte menduar se brenda kishte vetëm rroba. Ky pretendim u konsiderua “i pabesueshëm” nga prokuroria, një vlerësim me të cilin u pajtua edhe gjykatësi.
Sipas hetimeve, i riu kishte pranuar të udhëtonte drejt Tajlandës pasi kishte borxhe financiare. Ai deklaroi se një person në Tiranë i kishte ofruar një “zgjidhje”: të shkonte në Bangkok dhe të merrte një valixhe për ta sjellë në Evropë.
Avokatja e tij kërkoi mëshirë nga gjykata, duke argumentuar se i riu fiton rreth 400 euro në muaj në Shqipëri dhe kishte pranuar ofertën nga nevoja ekonomike. Sipas saj, valixhja iu dorëzua vetëm pak para nisjes nga Tajlanda dhe ishte e mbyllur me çelës, çka sipas mbrojtjes e kishte bërë të pamundur kontrollin e përmbajtjes.
Megjithatë, gjykata nuk e pranoi këtë argument dhe vendosi dënimin e kërkuar nga prokuroria: 40 muaj burg për trafikun e drogës.
Autoritetet theksojnë se fluturimet nga Tajlanda monitorohen gjithnjë e më shpesh, pasi pas liberalizimit të kanabisit në vend, rrjetet kriminale po përdorin “korrierë” për të transportuar sasi të mëdha droge drejt Evropës.
