Ish-presidenti francez Nicolas Sarkozy është paraqitur në Gjykatën e Apelit në Paris për një proces të ri gjyqësor lidhur me akuzat se kishte komplotuar për të siguruar fonde të paligjshme për fushatën e tij presidenciale nga regjimi i ish-diktatorit libian Muammar Gaddafi. Sarkozy i ka mohuar vazhdimisht akuzat, ndërsa rigjykimi pritet të zgjasë deri më 3 qershor.
71-vjeçari ishte burgosur në tetor të vitit të kaluar, ku qëndroi rreth 20 ditë përpara se të lirohej në pritje të procesit të apelit. Në një vendim të mëparshëm, një gjykatë e shkallës së parë e dënoi atë me pesë vite burg për konspiracion kriminal në lidhje me një skemë të dyshuar për financimin e fushatës së tij presidenciale të vitit 2007 nga Libia, megjithëse nuk u provua se ai i kishte marrë apo përdorur drejtpërdrejt fondet.
Sarkozy është përballur me disa çështje ligjore që pas largimit nga detyra dhe tashmë ka marrë dy dënime të tjera në raste të ndryshme, përfshirë një rast ku mbante edhe një byzylyk elektronik për disa muaj. Prokurorët pretendojnë se bashkëpunëtorët e tij kishin arritur një marrëveshje me regjimin e Gaddafit në vitin 2005 për financimin e fushatës presidenciale, ndërsa në këmbim Libisë do t’i jepej ndihmë për përmirësimin e imazhit ndërkombëtar. Ish-presidenti dhe bashkëshortja e tij, Carla Bruni, përballen gjithashtu me mundësinë e një tjetër gjyqi për akuza që lidhen me përpjekje për të korruptuar një dëshmitar kyç në këtë çështje.
