Princ Leka II ka kurorëzuar në martesë lidhjen e tij me fotografen, Blerta Celibashi. Lajmi është bërë publik nga Oborri Mbretëror Shqiptar përmes një komunikate zyrtare të shpërndarë në rrjetet sociale.
Sipas njoftimit, ceremonia e martesës është zhvilluar në një atmosferë private, larg vëmendjes së publikut, duke ruajtur karakterin intim dhe solemn të kësaj ngjarjeje.
Me rastin e martesës është publikuar edhe fotografia zyrtare e çiftit, e realizuar në Kështjellën Apponyi në Sllovaki. Ky vend historik nuk është zgjedhur rastësisht, pasi lidhet me historinë e familjes së Mbretëreshës Geraldinë, e cila kishte origjinë hungareze dhe familja e saj ka pasur lidhje me këtë rezidencë fisnike.
Sipas Oborrit Mbretëror, përzgjedhja e kështjellës është bërë për të nderuar trashëgiminë dhe origjinën e Mbretëreshës Geraldinë, një figurë që konsiderohet pjesë e rëndësishme e historisë së familjes mbretërore shqiptare.
Pas martesës, Blerta Celibashi do të mbajë mbiemrin e familjes Zogu dhe do të mbajë titullin “Princeshë e Shqiptarëve”.
