Një skenë apokaliptike ka përfshirë pasditen e sotme zonën e Milotit, ku shtëllunga gjigante tymi të zi kanë "pushtuar" qiellin, duke shndërruar nyjen kryesore rrugore të veriut në një zonë rreziku mjedisor.
Poshtë urës së Milotit, dhjetëra goma janë përfshirë nga flakët, duke lëshuar një tmerr të zi që ka mbuluar superstradën Lezhë–Laç. Drejtuesit e automjeteve janë përballur me vizibilitet pothuajse zero dhe një erë mbytëse, ndërsa banorët e zonës po thithin direkt helmet që çliron djegia e gomave.
"Nuk po marrim dot frymë! Kjo nuk është hera e parë, por sot tymi po na mbyt brenda në shtëpi," – shprehet një banor i irrituar i zonës.
Nuk bëhet fjalë për një aksident, por për një fenomen të përsëritur që duket se sfidon çdo ligj të mjedisit në Shqipëri.
Ndërsa flitet për turizëm dhe mjedis të pastër, Miloti sot ofron kartolinën e turpit. Pa ndërhyrjen e zjarrfikëseve dhe pa një hetim serioz nga Policia, kjo zonë do të vazhdojë të jetë "kurbani" i rradhës i papërgjegjshmërisë.
Deri kur do të lejohet që mushkëritë e qytetarëve të shërbejnë si filtër për tymin e zi të Milotit?
