Një 43-vjeçar është arrestuar nga policia në Vlorë, pasi ka ushtruar dhunë ndaj një punonjësi të Policisë Bashkiake gjatë kryerjes së detyrës.
Sipas njoftimit zyrtar të policisë, ngjarja ka ndodhur rreth orës 10:55 në rrugën Rruga Mitaq Salati, në lagjen 15 Tetori. Konflikti ka nisur pasi punonjësi i Policisë Bashkiake i ka vendosur një masë administrative drejtuesit të mjetit për parkim të gabuar.
Pas vendosjes së gjobës, 43-vjeçari, i identifikuar me inicialet M. L., dyshohet se ka reaguar me dhunë fizike ndaj punonjësit të policisë bashkiake, 28-vjeçarit me inicialet S. N., i cili ishte duke kryer detyrën.
Menjëherë pas ngjarjes, specialistët e Seksionit për Hetimin e Krimeve në Komisariatin e Policisë në Vlorë ndërhynë dhe arrestuan në flagrancë 43-vjeçarin.
Ndaj tij rëndon akuza për veprën penale “Goditje për shkak të detyrës”, ndërsa materialet procedurale i janë referuar Prokurorisë së Vlorës për veprime të mëtejshme.
