Detaje të reja kanë dalë nga dokumentet e publikuara nga Departamenti amerikan i Drejtësisë lidhur me çështjen e financierit të ndjerë dhe të dënuar për abuzime seksuale, Jeffrey Epstein. Një nga viktimat e tij ka treguar për Byronë Federale të Hetimit (FBI) se në rezidencën e Epstein në Manhattan ndodhej një fotografi dhe një skulpturë e një gruaje bjonde misterioze, për të cilën ai pretendonte se ishte “nëna e fëmijës së tij”.
Sipas dëshmisë së saj, vajza, një modele aspirante që dyshohet se është abuzuar nga Epstein që në moshën 16-vjeçare në vitin 2005, ka rrëfyer se fotografia ndodhej në një nga dhomat e mobiluara të rezidencës së tij në zonën Upper East Side të Manhattanit. Ajo e përshkroi si një pikturë të madhe të një gruaje të zhveshur në plazh, të varur pranë perdeve kafe. Sipas saj, Epstein kishte thënë se gruaja në pikturë ishte nëna e fëmijës së tij.
Në një dhomë tjetër të shtëpisë ndodhej edhe një skulpturë blu e bustit të një gruaje pa kokë, pa krahë dhe pa këmbë. Viktima ka treguar se Epstein e përshkruante atë grua si “perfekte” dhe shprehej se burri i saj do të ishte me shumë fat.
Ndërkohë, vëllai i Epstein ka mohuar vazhdimisht që ai të ketë pasur ndonjë fëmijë. Megjithatë, dokumente të Departamentit të Drejtësisë sugjerojnë të kundërtën. Në një email të vitit 2011, Sarah Ferguson, ish-bashkëshortja e Princit Andrew, i kishte dërguar një mesazh urimi Epstein-it për lindjen e një djali, duke shkruar se kishte dëgjuar nga “Duka” për ardhjen në jetë të fëmijës.
Jeffrey Epstein kishte nënshkruar edhe testamentin më 8 gusht 2019, vetëm dy ditë para se të gjendej i vdekur në qelinë e tij në burg. Në dokument ai parashikonte që pasuritë e tij, përfshirë ishullin privat, rreth 50 milionë dollarë dhe rezidencën në Upper East Side, t’i kalonin të dashurës së tij të fundit të njohur, Karina Suljak.
Këto zbulime hedhin dritë të re mbi jetën private dhe rrjetin e ndërlikuar të marrëdhënieve të Epstein, një çështje që vazhdon të mbetet nën vëmendjen e autoriteteve dhe opinionit publik.
