Procedura e tenderit për ndërtimin e portit të ri tregtar në zonën e Porto Romanos është ndërprerë. Vendimi erdhi pasi kompania e fundit që kishte mbetur në garë nuk dorëzoi ofertën financiare brenda afatit të caktuar.
Bëhet fjalë për kompaninë Archirodon, e cila kishte kaluar në fazën përfundimtare të garës, por nuk paraqiti ofertën ekonomike më 9 mars. Si pasojë, procedura është konsideruar e dështuar dhe është anuluar.
Tenderi për projektin kishte një vlerë të parashikuar rreth 422 milionë euro dhe synonte ndërtimin e portit të ri tregtar në Porto Romano, një investim që shihet si pjesë e rëndësishme e zhvillimit të infrastrukturës portuale në vend.
Anulimi i procedurës vjen gjithashtu në një moment kur projekti kishte marrë kritika publike nga Dhoma Amerikane e Tregtisë, e cila kishte ngritur shqetësime lidhur me procesin e tenderimit dhe transparencën e tij.
