Një shtetas turk, 36-vjeçari Halil Uçar, mbeti i plagosur mbrëmjen e djeshme në një lokal në zonën e Saukut të Vjetër në Tiranë, pasi u qëllua me armë zjarri nga një bashkëkombës i tij. I plagosuri është marrë në pyetje nga hetuesit, por nuk është treguar bashkëpunues, duke pretenduar se nuk e njeh autorin dhe se nuk ka pasur konflikte me të.
Sipas policisë, autori dhe i plagosuri ndodheshin në tavolina të ndryshme dhe në kate të ndryshme të lokalit. Pasi kishte konsumuar darkën në katin e parë, autori është ngjitur në katin e dytë dhe ka qëlluar drejt Uçarit, duke e plagosur me një plumb në shpatull, përpara se të largohej me shpejtësi nga vendngjarja.
Nga kamerat e sigurisë janë siguruar disa foto të autorit dhe policia po punon për krijimin e identikitit të tij. Në vendngjarje janë mbledhur materiale gjenetike për identifikim, ndërsa përmes Interpolit po bashkëpunohet me autoritetet turke për të zbardhur identitetin e autorit dhe për të verifikuar nëse mes tyre ka pasur konflikte të mëparshme në Turqi.
