Çmimet e naftës në tregjet ndërkombëtare kanë pësuar luhatje të forta gjatë ditëve të fundit, pasi tensionet në Lindjen e Mesme rritën ndjeshëm frikën për një krizë të furnizimit me energji. Standardi global i referencës, Brent crude oil, u ngjit deri në 119.50 dollarë për fuçi, niveli më i lartë i katër viteve të fundit, ndërsa konflikti mes SHBA-së, Izraelit dhe Iran krijoi pasiguri të madhe në tregjet energjetike.
Megjithatë, situata ndryshoi shpejt pasi presidenti amerikan Donald Trump deklaroi se lufta kundër Iranit mund të përfundojë “shumë shpejt”. Pas kësaj deklarate, tregjet reaguan menjëherë dhe çmimi i naftës Brent ra ndjeshëm, duke zbritur në rreth 91.58 dollarë për fuçi. Trump u përpoq të minimizonte rritjen e mëparshme të çmimeve, duke theksuar se ato kishin shënuar një rritje më të ulët nga sa pritej.
Pavarësisht kësaj, deklaratat e mëvonshme të presidentit amerikan krijuan një klimë të re pasigurie. Ai paralajmëroi se nëse Irani ndërhyn për të bllokuar furnizimin me naftë përmes Ngushtica e Hormuzit, SHBA do të reagojë “njëzet herë më fort”. Kjo ngushticë është një nga rrugët më strategjike për tregtinë globale të energjisë, pasi rreth një e pesta e naftës dhe gazit që transportohet me cisterna në botë kalon përmes saj.
Nga ana tjetër, autoritetet në Iran kanë paralajmëruar se nuk do të lejojnë eksportin e naftës nga rajoni nëse sulmet amerikane dhe izraelite vazhdojnë. Për shkak të këtyre zhvillimeve, tregjet energjetike kanë përjetuar një nga periudhat më të paqëndrueshme që nga kriza e pandemisë së COVID-19 dhe pasojat e pushtimit rus të Ukrainës 2022.
Ndërkohë, shqetësimet për rritjen e kostove të karburantit dhe pasiguria për furnizimet kanë shtyrë disa qeveri të ndërhyjnë në treg. Shtete si Kroacia, Hungaria, Koreja e Jugut dhe Tajlanda kanë vendosur kufij maksimalë për çmimet e karburanteve për të zbutur ndikimin tek konsumatorët dhe për të shmangur mungesat në tregjet e tyre.
