Banka Botërore e rendit Shqipërinë ndër vendet që nuk aplikojnë standarde të unifikuara për rekrutimin e talenteve në administratën publike.
Sipas Raportit tie Zhvillimit Global 2025, praktikat e punësimit në institucionet shtetërore në Shqipëri ndryshojnë ndjeshëm, duke bërë që shanset e një kandidati për t’u punësuar të varen më shumë nga institucioni ku aplikon sesa nga një sistem i përbashkët kombëtar.
Raporti vëren se mesatarisht rreth 50% e nëpunësve civilë në vend rekrutohen përmes procedurave meritokratike me provim me shkrim. Megjithatë, në disa institucione kjo praktikë përdoret në vetëm rreth 20% të rasteve, ndërsa në të tjera kalon mbi 70%.
Sipas Bankës Botërore, këto diferenca tregojnë se procesi i rekrutimit në administratë varet më shumë nga rregullat e brendshme të institucioneve sesa nga standarde të unifikuara në nivel kombëtar.
Raporti sugjeron se Shqipëria ka nevojë për harmonizim të procedurave të rekrutimit dhe për më shumë fokus te identifikimi i talenteve, jo vetëm te ndjekja formale e rregullave burokratike.
