Jetesa në Shqipëri po bëhet dita-ditës më e kushtueshme, ku strehimi dhe ushqimi mbeten dy barrët kryesore për buxhetet familjare. Të dhënat më të fundit të Institutit të Statistikave (INSTAT) konfirmojnë një rritje të ndjeshme të inflacionit për muajin shkurt 2026, duke arritur në 2.5%, një kërcim domethënës krahasuar me shifrën 1.9% që regjistrohej në të njëjtën periudhë të një viti më parë.
Ndryshe nga vitet e kaluara ku karburanti apo kriza globale diktonin çmimet, ky fillim viti po dominohet nga kriza e strehimit. Sipas INSTAT, mbi 1% e rritjes totale të inflacionit erdhi vetëm nga grupi i qirave, ujit dhe energjisë elektrike.
Shtrenjtimi i qirave ka regjistruar një rritje vjetore prej 5.3%, duke u bërë kështu faktori më rëndues për qytetarët, veçanërisht në qendrat urbane ku kërkesa është e lartë. Pas tyre vijnë ushqimet, të cilat vijojnë të shtrenjtohen me një ndikim prej 0.6% në normën e përgjithshme, duke e bërë shportën bazë gjithnjë e më të papërballueshme.
Një tjetër grup që ka dhënë goditje në shkurt është ai i "Sigurimeve dhe shërbimeve financiare", me një rritje prej 4.3%. Kjo pasqyron drejtpërdrejt rritjen e policave të sigurimit për automjetet, ku pas rishikimit të rrezikut nga aksidentet, drejtuesit e mjeteve po paguajnë tarifa më të larta për sigurimin e mjeteve të tyre.
Edhe pse qiratë po udhëheqin rritjen brenda vendit, rreziqet nga jashtë po shtohen. Lufta në Lindjen e Mesme ka nisur të reflektohet në çmimin e karburanteve në Shqipëri, duke krijuar frikën për një valë të dytë inflacioni me çmime akoma më të "kripura" në muajt në vijim.
Kjo situatë e re mund të detyrojë Bankën e Shqipërisë të rishikojë parashikimet e saj. Para nisjes së tensioneve në Lindjen e Mesme, Banka parashikonte një inflacion mesatar prej 3.6% për këtë vit – një shifër kjo mbi objektivin e synuar prej 3% – por presioni nga nafta dhe kostot e larta të ndërtimit/qirave mund ta çojnë këtë shifër akoma më lart.
