Një furgon i Policisë së Shtetit është filmuar duke lëvizur në rrugë ndërsa nga marmita e tij del një sasi e madhe tymi të zi. Pamjet tregojnë qartë se mjeti është në gjendje të rënduar teknike, duke ndotur ajrin dhe duke ngritur pikëpyetje serioze për standardet e kontrollit teknik të automjeteve shtetërore.
Në një kohë kur qytetarët penalizohen për çdo detaj të vogël gjatë kolaudimit të automjeteve, duket se për mjetet e institucioneve shtetërore standardet janë të tjera. Tym i zi i dendur zakonisht është tregues i problemeve serioze me motorin dhe sistemin e djegies, një gjendje që në teori nuk duhet të kalojë kontrollin teknik.
Ngjarja ngre një pyetje të thjeshtë: nëse një automjet privat do të ishte në këtë gjendje, a do të kalonte kolaudimin? Rasti tregon edhe një herë kontrastin mes rregullave që zbatohen për qytetarët dhe realitetit që shpesh shihet në rrugë me mjetet e institucioneve publike.
