Tensionet mes Ukrainës dhe Hungarisë janë rritur pas një deklarate të presidentit ukrainas Volodymyr Zelensky, drejtuar kryeministrit hungarez Viktor Orbán, në lidhje me bllokimin e një pakete të madhe ndihme financiare nga Bashkimi Europian.
Gjatë një konference për shtyp, Zelensky reagoi ndaj vendimit të Hungarisë për të penguar paketën prej rreth 90 miliardë eurosh, e cila synon të mbështesë Ukrainën në luftën kundër Rusisë.
“Shpresojmë që një person në BE të mos e bllokojë këtë paketë prej 90 miliardësh. Përndryshe do t’i japim adresën e tij forcave tona të armatosura që ta telefonojnë dhe t’i flasin në gjuhën e tyre,” deklaroi Zelensky.
Komentet e presidentit ukrainas vijnë në një moment marrëdhëniesh të tensionuara mes Kievit dhe Budapestit. Hungaria e Viktor Orbán ka kundërshtuar disa vendime të Bashkimit Europian që lidhen me ndihmën financiare dhe ushtarake për Ukrainën.
Mosmarrëveshjet mes dy vendeve janë shtuar edhe për çështje energjetike, përfshirë furnizimin me naftë përmes tubacionit Druzhba, një nga rrugët kryesore të transportit të energjisë në rajon.
Pas deklaratës së Zelenskyt, zyrtarë të qeverisë hungareze reaguan duke e kritikuar gjuhën e përdorur nga presidenti ukrainas dhe duke theksuar se marrëdhëniet mes dy vendeve janë përkeqësuar gjatë muajve të fundit.
