Kryeministri i Spanjës, Pedro Sánchez, ka ashpërsuar tonet ndaj Uashingtonit, duke akuzuar Shtetet e Bashkuara se po “luajnë ruletë ruse me jetën e miliona njerëzve” për shkak të përfshirjes në sulmet e përbashkëta me Izraelin ndaj Iranit.
Deklarata e tij vjen një ditë pasi presidenti amerikan Donald Trump kërcënoi se do të ndërpresë marrëdhëniet tregtare me Madridin, si reagim ndaj refuzimit të Spanjës për të lejuar përdorimin e bazave ushtarake të përbashkëta në territorin e saj për operacione kundër Teheranit.
Në një fjalim televiziv drejtuar kombit, Sánchez e përmblodhi qëndrimin e qeverisë së tij me katër fjalë: “Jo luftës”.
Ai i cilësoi bombardimet amerikano-izraelite ndaj Iranit si “të pajustifikuara dhe të rrezikshme”, duke paralajmëruar për pasoja të rënda rajonale dhe globale. Sipas tij, përshkallëzimi ushtarak rrezikon stabilitetin ndërkombëtar dhe mund të çojë në një konflikt më të gjerë me pasoja të paparashikueshme.
Përplasja ka rritur tensionet mes dy vendeve anëtare të NATO-s. Spanja ka refuzuar t’i japë leje SHBA-së për të përdorur bazat e përbashkëta ushtarake në territorin spanjoll për operacione që lidhen me luftën në Lindjen e Mesme.
Nga ana tjetër, administrata amerikane ka reaguar ashpër, duke e konsideruar qëndrimin e Madridit si pengesë për strategjinë e saj ushtarake në rajon.
Sánchez u bëri thirrje liderëve botërorë të “mësojnë nga historia”, duke nënkuptuar rreziqet që sjellin ndërhyrjet ushtarake të pakalkuluara.
Debati mes Madridit dhe Uashingtonit pritet të thellohet në ditët në vijim, ndërsa situata në Lindjen e Mesme mbetet e tensionuar dhe me ndikim të drejtpërdrejtë në ekuilibrat globalë.
