Ne redaksinë e JOQ ka mbërritur një denoncim nga një qytetar në Vlorë, i cili ngre alarmin për një situatë të rrezikshme në zonën e Skelës, tek pallati i Çobos. Sipas denoncuesit, një pllakë në fasadën e pallatit është shkëputur dhe rrezikon të bjerë nga lartësia, duke vënë në rrezik serioz jetën e kalimtarëve dhe banorëve të zonës.
Siç shihet edhe në foton e dërguar pranë redaksisë, pllaka është e dëmtuar dhe qëndron e varur në pjesën e jashtme të godinës. Çdo moment ajo mund të shkëputet plotësisht, sidomos nëse ka erë apo lëkundje të forta, duke u kthyer në një rrezik potencial për këdo që kalon poshtë pallatit.
Qytetarët kërkojnë ndërhyrje të menjëhershme nga administratorët e pallatit dhe institucionet përgjegjëse, për të shmangur një ngjarje të rëndë. Ata bëjnë apel që të merren masa sa më parë, përpara se neglizhenca të sjellë pasoja për jetën e njerëzve.
