Një qytetar ka denoncuar një rast shqetësues të hedhjes së paligjshme të mbetjeve spitalore në zonën e Kuqit në Vlorë.
Sipas denoncuesit, mbetjet me përmbajtje spitalore po depozitohen në një hapësirë të papërshtatshme dhe jashtë çdo standardi të sigurisë. Ai shprehet se materialet e hedhura përbëjnë rrezik të drejtpërdrejtë për shëndetin publik, pasi mund të jenë të kontaminuara dhe potencialisht të rrezikshme për banorët e zonës, veçanërisht për fëmijët dhe personat që frekuentojnë afërsi të vendit ku po hidhen.
Sipas tij, zona ku po depozitohen mbetjet nuk është e përcaktuar për trajtimin apo grumbullimin e mbetjeve spitalore dhe mungojnë masat mbrojtëse, sinjalistika apo kontrolli nga autoritetet përkatëse.
Qytetari kërkon ndërhyrje të menjëhershme nga institucionet përgjegjëse për mjedisin dhe shëndetin publik, me qëllim verifikimin e situatës në terren, identifikimin e përgjegjësve dhe marrjen e masave ligjore për ndalimin e kësaj praktike të rrezikshme. Ai thekson se raste të tilla përbëjnë shkelje të rëndë të ligjit dhe rrezik serioz për komunitetin dhe mjedisin.
Denoncimi i qytetarit:
Dua te denecoj kte gje te paligjshme qe mbetjet spitalore po hidhen ne nje vend te papershtatshem vendodhja kuq-Vlore anonim
