Tensionet në Lindjen e Mesme po thellohen ndjeshëm, ndërsa Katari ka njoftuar se forcat e tij ajrore kanë rrëzuar dy avionë luftarakë të Iran, në një zhvillim që shënon një përshkallëzim të rrezikshëm të situatës në rajon.
Sipas një deklarate zyrtare nga Ministria e Mbrojtjes e Katarit, janë rrëzuar dy avionë tip SU-24 të forcave ajrore iraniane, të cilët dyshohet se po operonin në kuadër të sulmeve hakmarrëse të Teheranit. Autoritetet bëjnë të ditur se janë neutralizuar gjithashtu shtatë raketa balistike dhe pesë dronë të lëshuar drejt territorit të Katarit.
“Kërcënimi u trajtua menjëherë sapo u identifikua, në përputhje me planin operacional. Të gjitha raketat u rrëzuan para se të arrinin objektivat e tyre”, thuhet në deklaratën zyrtare.
Zyrtarët në Doha e cilësuan veprimin e Iranit si një “shënjestrim të papërgjegjshëm dhe të pamatur” ndaj territorit të tyre, duke theksuar se do të ndërmarrin çdo masë të nevojshme për të garantuar sigurinë kombëtare.
Përplasja vjen në sfondin e sulmeve të fundit amerikano-izraelite ndaj objektivave në Iran, të cilat sipas raportimeve kanë shkaktuar qindra viktima. Në përgjigje, Teherani ka ndërmarrë një seri sulmesh ndaj disa vendeve të rajonit, përfshirë Katarin, Kuvajtin, Emiratet e Bashkuara Arabe dhe Arabinë Saudite.
Situata mbetet tepër e tensionuar dhe ekziston frika reale se konflikti mund të zgjerohet më tej, duke përfshirë edhe shtete të tjera të Lindjes së Mesme. Zhvillimet e orëve dhe ditëve në vijim pritet të jenë vendimtare për ecurinë e krizës.
