Mediat izraelite raportojnë se ish-presidenti i Iranit, Mahmoud Ahmadinejad, dyshohet se është vrarë në sulmet ajrore të ndërmarra nga Izraeli në territorin iranian.
Sipas gazetës izraelite Ma’ariv, Ahmadinejad ndodhej në arrest shtëpie në momentin e sulmit dhe është goditur në një sulm të targetuar ndaj banesës së tij. Deri tani nuk ka një konfirmim zyrtar nga autoritetet iraniane.
Ahmadinejad shërbeu si president i gjashtë i Iranit nga viti 2005 deri në 2013. Ai u bë një figurë shumë e diskutueshme në arenën ndërkombëtare, sidomos për qëndrimet e tij të ashpra ndaj Izraelit dhe retorikën e fortë lidhur me programin bërthamor iranian.
Rizgjedhja e tij në vitin 2009 shkaktoi protesta masive të njohura si “Lëvizja e Gjelbër”, të cilat u shtypën me forcë nga autoritetet iraniane, duke shënuar një nga krizat më të mëdha të brendshme në Republikën Islamike.
Gjatë presidencës së tij, Këshilli i Sigurimit i OKB-së vendosi disa raunde sanksionesh ndaj Iranit për shkak të programit bërthamor, duke thelluar izolimin ekonomik të vendit.
Ahmadinejad u bë veçanërisht i njohur në Perëndim për deklaratat e tij kundër Izraelit dhe për konferencën e vitit 2006 në Teheran, e cila u dënua gjerësisht ndërkombëtarisht si platformë për mohimin e Holokaustit.
Në vitet e fundit, ai pati përplasje të hapura me Udhëheqësin Suprem Ali Khamenei dhe iu ndalua disa herë kandidimi për president, çka u interpretua si një margjinalizim i tij brenda establishmentit politik iranian.
Ndërkohë, raportime të tjera ndërkombëtare pretendojnë se edhe Ali Khamenei dyshohet se është vrarë në valën e parë të sulmeve të koordinuara SHBA-Izrael ndaj Teheranit, por edhe për këtë zhvillim mungon një konfirmim i plotë dhe i pavarur nga burime zyrtare iraniane.
Situata në Iran mbetet shumë e tensionuar, ndërsa priten reagime zyrtare dhe zhvillime të tjera në orët në vijim.
