Pas daljes nga burgu, ish-ministri i Mjedisit Lefter Koka duket se i është rikthyer “rutinës” së përditshme. Ai është parë së fundmi në ambientet e kafeneve në Tiranë, duke shijuar cigaren dhe një shishe birrë larg zhurmës së qelive dhe shumë pranë zhurmës së filxhanëve.
Koka u arrestua në dhjetor 2021 me akuza për shpërdorim detyre, korrupsion dhe pastrim parash në lidhje me aferën e inceneratorit të Fierit. Sipas SPAK, për këtë incenerator u paguan rreth 4 milionë euro për punë të pakryera, ndërsa dëmi i pretenduar në buxhetin e shtetit arrin në miliona lekë, shifra që për qytetarët duken marramendëse, por për dosjet gjyqësore janë thjesht “akte”.
Vendimi i fundit i Gjykata e Posaçme shoi masën e sigurisë që e mbante në burg për këtë çështje, duke i hapur rrugë lirisë së tij. Dhe kështu, mes birrës dhe tymit të cigares, duket se kapitulli i qelisë është mbyllur përkohësisht, ndërsa ai i jetës publike ka rifilluar pa shumë zhurmë të paktën jo aq sa zhurma e inceneratorëve që nuk u ndërtuan kurrë.
