Foka e Mesdheut (Monachus monachus), një specie e rrallë dhe e rrezikuar sipas Listës së Kuqe Shqiptare dhe konventave ndërkombëtare, është parë sërish në ujërat pranë Parkut Detar Karaburun-Sazan.
Sipas peshkatarëve të Radhimës, foka është vërejtur duke u ushqyer me një oktapod pranë gadishullit të Karaburunit. Ky fenomen i përsëritur jep shpresë se specia nuk është thjesht kalimtare në këto zona, por mund të konsiderohet banore e përhershme e ujërave shqiptare.
Ekspertët e ekologjisë detare shprehin optimizëm, duke theksuar rëndësinë e ruajtjes së habitatit natyror të kësaj specie të rrezikuar. Prezenca e saj e shpeshtë në Karaburun-Sazan tregon potencialin për të forcuar biodiversitetin dhe për të nxitur më shumë projekte mbrojtjeje në bregdetin shqiptar.
