SPAK sekuestron dosjen e tenderit për projektin e Porto Romanos

Ndërkohë, ky zhvillim vjen në një moment politik të ndjeshëm. Kryeministri Edi Rama, sipas një burimi të pranishëm në mbledhjen e zhvilluar në Pallatin e Brigadave, ka shprehur shqetësim për presione të jashtme mbi hetimet që po kryhen në vend. Ai ka theksuar se qeveria gjermane dhe konkretisht ministri i Jashtëm gjerman, Johan Wadephul, po ndërmarrin veprime që, sipas tij, dëmtojnë interesat e Shqipërisë dhe ndikojnë në nxitjen e hetimeve të SPAK, fillimisht për çështjen e AKSHI-t dhe tani edhe për tenderin e Porto Romanos.

Ministri gjerman kishte vizituar Tiranën në nëntor të vitit të kaluar, ku, përveç takimeve politike, zhvilloi edhe një takim me kreun e SPAK, Altin Dumani, dhe vlerësoi publikisht punën e Prokurorisë së Posaçme, duke deklaruar se SPAK po bën “një punë vërtet shumë të shkëlqyer” në luftën kundër korrupsionit. Ndërkohë, hetimi për Porto Romanon pritet të intensifikojë debatet mbi rolin e SPAK, pavarësinë e tij dhe ndikimin e presioneve të jashtme mbi projekte strategjike të qeverisë.

Projekti i portit të ri në Porto Romano mbetet një nga investimet më të mëdha infrastrukturore në vend, ndërsa zhvillimet e fundit pritet të rrisin tensionet politike dhe të vënë në qendër të vëmendjes publikun dhe aktorët ndërkombëtarë mbi mënyrën se si SPAK dhe institucionet shqiptare trajtojnë procedurat e tenderimit për projekte të mëdha strategjike.