Dhjetëra mësues, infermierë dhe mjekë në disa zona të juglindjes së vendit përballen çdo ditë me vështirësi serioze për të mbërritur në vendet e tyre të punës, për shkak të shembjes së rrugës Librazhd-Pogradec, e cila prej disa ditësh është bërë e pakalueshme.
Ata udhëtojnë me mjete të ndryshme deri disa kilometra larg pikës ku ka ndodhur shembja. Më pas detyrohen të ecin rreth 30 minuta në këmbë dhe, në zonën e dëmtuar, kalojnë me shumë vështirësi në anën tjetër të rrugës, drejt Pogradecit. Atje i pret një mjet tjetër transporti, i cili i dërgon deri në destinacionet përkatëse të punës.
Të njëjtat peripeci i përballojnë edhe në kthim, ndërsa gjithçka tregon se kjo do të mbetet një rutinë e përditshme për një kohë të gjatë.
Ndërkohë ARRSH ka deklaruar se aktualisht nuk mund të jepet një afat i saktë për stabilizimin e plotë të rrëshqitjes, pasi po vijojnë studimet teknike në terren. Për momentin është ndërtuar një rrugë provizore rreth 1.3 kilometra buzë Shkumbinit me qëllim zgjidhjen provizore të qarkullimit.
