Një video e publikuar së fundmi në Instagram po bën xhiron e rrjetit, duke mbledhur miliona shikime dhe mijëra komente plot habi. Pamjet vijnë nga Italia dhe tregojnë një skenë që duket thuajse e pamundur: një “Dacia Jogger” e parkuar në një hapësirë ekstremisht të ngushtë.
Makina shfaqet e parkuar në mënyrë milimetrike mes dy pengesave fikse.
Në pjesën e pasme, ajo është pothuajse e ngjitur me trungun e një peme.
Në pjesën e përparme, ndodhet vetëm pak centimetra larg një shtylle betoni.
Autori i videos dëgjohet i habitur teksa përsërit në italisht: “Si ia doli?”. Në një moment ai shton me humor: “Ose pemën dhe shtyllën i kanë ndërtuar pasi është parkuar makina, ose këtu ka diçka që nuk shkon.”
Dhe në fakt, pamjet të lënë pa fjalë. Hapësira duket aq e ngushtë sa shumë përdorues pyesin veten jo vetëm si u fut makina aty, por mbi të gjitha: si do të dalë?
Videoja ka ndezur një valë teorish në rrjet. Disa e quajnë një nga parkimet më të sakta që janë parë ndonjëherë dhe mendojnë se shoferi meriton “medalje ari” për aftësi ekstreme. Të tjerë janë më skeptikë dhe hedhin dyshime se mjeti mund të jetë zhvendosur me karroatrec apo pajisje speciale vetëm për efekt viral.
E vërteta mbetet e paqartë, por një gjë është e sigurt: ky parkim ka arritur atë që shumë përpiqen, të pushtojë internetin.
Po ju si mendoni? A është mjeshtëri e pastër në timon, apo një skenë e krijuar për klikime? Shkruani mendimin tuaj.
