Evis Sala, ministrja e Shëndetësisë dhe Mbrojtjes Sociale zotëron asete që, në total, llogariten rreth 5.3–5.6 milionë euro.
Në dokumentacionin zyrtar, Evis Sala ka pasqyruar pasuritë personale dhe ato të familjarëve të lidhur, përfshirë bashkëshortin Gëzim Selenica dhe djalin Pier Selenica. Struktura e pasurisë bie në sy për shpërndarjen e saj në instrumente financiare jashtë vendit, përfshirë fonde investimi me vlerë disa milionë euro dhe llogari pensioni të denominuara në valuta të huaja si dollarë amerikanë (USD) dhe paund britanikë (GBP).
Megjithëse në listë përfshihen edhe prona të paluajtshme me standard të lartë, pesha kryesore e portofolit është e orientuar drejt tregjeve kapitale ndërkombëtare. Kjo e pozicionon ministren si një nga zyrtaret me ekspozim financiar të konsiderueshëm jashtë Shqipërisë. Paralelisht, në deklarim figuron edhe një kredi bankare aktive.
Vlera totale e aseteve që përfshin pasuri të paluajtshme, llogari bankare dhe investime raportohet të jetë afërsisht 5,640,000 euro.
Por në një reagim publik mbrëmjen e djeshme, ministrja u shpreh: “Pasuria ime e deklaruar është e ulët për nivelin e një mjeku, në fakt të dy mjekëve pasi edhe bashkëshorti ka qenë kirurg…”
Deklarata ka nxitur debat publik, veçanërisht në një klimë ku vërtetësia mbi pasuritë e shumë zyrtarëve të lartë po vihet nën hetim nga SPAK.
