Në Irlandë, çdo lopë pajiset me një pasaportë zyrtare që nga momenti i lindjes. Dhe jo, nuk bëhet fjalë për një dokument simbolik, por për një sistem të mirëfilltë identifikimi dhe gjurmueshmërie që e ndjek kafshën gjatë gjithë jetës.
Menjëherë pas lindjes, çdo viç merr një numër unik identifikimi dhe etiketa në vesh, si dhe një dokument në formë pasaporte ku regjistrohen të dhëna të rëndësishme, data e lindjes, raca, ferma e origjinës dhe pronësia. Ky dokument përditësohet sa herë që kafsha zhvendoset, shitet apo eksportohet.
Sistemi është pjesë e ligjeve strikte të Irlandës për gjurmueshmërinë e kafshëve, të krijuara për të garantuar sigurinë ushqimore, mirëqenien e kafshëve dhe kontrollin e sëmundjeve. Edhe pse prejardhja e detajuar ruhet në regjistra të veçantë mbarështimi, “pasaporta” siguron që çdo hap i jetës së lopës të jetë i dokumentuar dhe i verifikueshëm.
