Një skenë dramatike në Aeroportin Ndërkombëtar të Almaty në Kazakistan u mbyll falë guximit të një qytetari 52-vjeçar, i cili u ofrua të zëvendësonte një punonjëse sigurie të marrë peng me thikë, dhe më pas arriti të çarmatoste agresorin.
Sulmuesi, identiteti i të cilit nuk është bërë publik, kapi 21-vjeçaren Botagoz Mukhtarova nga flokët dhe e kërcënoi me një thikë të madhe, duke pretenduar se kishte edhe një pajisje shpërthyese. Pamjet tregojnë momentet e panikut, ndërsa rojet e tjera të sigurisë përpiqeshin të menaxhonin situatën.
Në atë çast ndërhyri Musa Abdraim, baba i pesë fëmijëve dhe ish-sportist i arteve marciale, i cili iu afrua qetësisht agresorit dhe i kërkoi të lironte vajzën duke e marrë atë peng në vend të saj. “Pashë që do ta godiste me thikë. I thashë: ‘Më merr mua në vend të saj’”, deklaroi ai më vonë.
Agresori pranoi. Por pasi priti momentin e duhur, Abdraim i rrëmbeu thikën nga dora dhe, pas një përplasjeje të shkurtër, oficerët e sigurisë ndërhynë duke neutralizuar dhe arrestuar të dyshuarin.
Sipas autoriteteve kazake, ai përballet me deri në 12 vite burg. Abdraim tha se reagoi instinktivisht dhe se në të kaluarën kishte praktikuar boks, arte marciale dhe kickboks.
Ngjarja ka ndodhur në mars 2025, por së fundmi është rikthyer në vëmendje dhe është bërë virale në rrjetet sociale për shkak të pamjeve tronditëse dhe aktit të guximshëm që shmangu një tragjedi.
