Bodø/Glimt realizoi një nga surprizat më të mëdha në historinë e fundit të Champions League, duke eliminuar tre herë kampionët e Evropës, Interin, pas një fitoreje 2-1 në “Giuseppe Meazza” dhe 5-2 në total.
Skuadra norvegjeze, që kishte fituar edhe ndeshjen e parë, përsëriti suksesin në transfertë dhe siguroi kualifikimin në fazën e 1/8-ave, duke u bërë ekipi i parë norvegjez që kalon një raund me eliminim direkt në elitën evropiane që prej vitit 1987. Interi, lider i Serie A, kishte nevojë për një fitore me tre gola diferencë, diçka që nuk e kishte arritur më parë në një ndeshje me eliminim direkt në Champions League.
Zikaltrit nisën fuqishëm dhe krijuan disa raste të pastra në pjesën e parë. Sebastiano Esposito goditi me kokë ngushtë mbi traversë, ndërsa Davide Frattesi dhe Federico Dimarco u ndalën nga portieri Nikita Haikin, protagonist absolut me disa pritje vendimtare. Edhe pse loja u zhvillua kryesisht në gjysmën e fushës së miqve, Bodø/Glimt paralajmëroi rrezikun në minutën e 36-të, kur Yann Sommer u detyrua të ndërhynte me vështirësi pas një goditjeje me kokë të Håkon Evjen.
Në pjesën e dytë, erdhi momenti që ndryshoi gjithçka. Një gabim në zotërim nga Manuel Akanji i dha mundësinë Ole Blomberg të tentonte portën; topi i devijuar përfundoi te Jens Petter Hauge, i cili realizoi për 1-0 në minutën e 58-të. Në minutën e 72-të, ishte sërish Hauge protagonist, këtë herë si asistues. Pasimi i tij depërtues gjeti Evjen, i cili kontrolloi dhe mposhti Sommer për 2-0, duke shuar praktikisht çdo shpresë për rikthim. Alessandro Bastoni ngushtoi diferencën katër minuta më vonë, por ishte tepër vonë për një “remontada”.
Bodø/Glimt nuk kishte fituar asnjë ndeshje në Champions League para janarit të këtij sezoni. Tashmë, me katër fitore radhazi në kompeticion, skuadra nga Rrethi Arktik siguron një vend në shortin e së premtes për fazën e 1/8-ave. Nga ana tjetër, Interi dështon të arrijë në 16 më të mirat për herë të parë që nga sezoni 2020/21. Eliminimi i nënkampionëve të Evropës nga një skuadër modeste konfirmon se Champions League vazhdon të prodhojë histori të pabesueshme.
