Irani ka paralajmëruar se do të reagojë “egërsisht” ndaj çdo sulmi të mundshëm nga Shtetet e Bashkuara, duke rritur më tej tensionet mes dy vendeve.
Deklarata vjen pasi presidenti amerikan Donald Trump tha javën e kaluar se po shqyrton mundësinë e një sulmi të kufizuar nëse Teherani nuk pranon një marrëveshje për programin e tij bërthamor.
Zëdhënësi i Ministrisë së Jashtme iraniane, Esmaeil Baqaei, u shpreh se çdo goditje, qoftë edhe e kufizuar, do të konsiderohej “akt agresioni”.
“Çdo shtet do të reagojë ndaj një akti agresioni… në mënyrë të egër. Kjo është ajo që do të bënim ne,” deklaroi ai.
Pavarësisht retorikës së ashpër, të dyja palët pritet të rifillojnë bisedimet indirekte në Gjenevë për një marrëveshje të mundshme mbi programin bërthamor iranian.
Irani këmbëngul se programi i tij është për qëllime civile, ndërsa Perëndimi dyshon se synon ndërtimin e armës atomike. Uashingtoni kërkon gjithashtu të diskutojë programin e raketave dhe mbështetjen iraniane për grupet e armatosura në rajon, diçka që Teherani e ka refuzuar.
Zyrtarë iranianë paralajmëruan se çdo sulm mund të çojë në një përshkallëzim që nuk do të mbetet i kufizuar vetëm mes dy vendeve, por mund të përfshijë gjithë rajonin.
Rritja e tensioneve ka shtuar shqetësimet ndërkombëtare. Disa vende, përfshirë Indinë dhe shtete evropiane, u kanë bërë thirrje qytetarëve të tyre të largohen nga Irani si masë paraprake.
Ndërkohë, SHBA ka urdhëruar largimin e stafit jo thelbësor nga ambasada në Liban, vend ku operon Hezbollah, një grup me lidhje të ngushta me Iranin.
Edhe Kina ka reaguar, duke paralajmëruar kundër përdorimit të forcës dhe përshkallëzimit të ri të konflikteve.
Tensionet e jashtme po shoqërohen edhe me trazira të brendshme. Studentë në disa universitete në Teheran kanë rinisur protestat kundër qeverisë, duke rikthyer slogane kundër Republikës Islamike.
Autoritetet iraniane kanë pranuar mijëra viktima gjatë protestave të mëparshme, ndërsa organizata të të drejtave të njeriut raportojnë shifra edhe më të larta.
