Një aksident i rëndë me pasojë vdekjen ka tronditur veriun e vendit gjatë ditës së sotme. Ngjarja e rëndë është shënuar në aksin rrugor që lidh Bajram Currin me Bujanin, ku një automjet ka humbur kontrollin dhe ka dalë nga rruga.
Si pasojë e përplasjes së fortë, drejtuesi i mjetit ka ndërruar jetë në vend. Ende mbeten të paqarta shkaqet që çuan në këtë dalje fatale nga rruga, ndërsa policia po ekzaminon vendin e ngjarjes.
Menjëherë pas sinjalizimit, forcat e policisë dhe grupi hetimor kanë mbërritur në vendin e aksidentit. Ekspertët po punojnë për zbardhjen e plotë të rrethanave të ngjarjes dhe për të përcaktuar nëse shkak ka qenë shpejtësia tej normave, ndonjë defekt teknik i mjetit apo gjendja e rrugës.
Trupi i pajetë i drejtuesit është transportuar drejt morgut, ndërsa pritet që në orët në vijim të ketë një njoftim zyrtar mbi identitetin e viktimës dhe dinamikën e plotë të kësaj tragjedie rrugore.
