Rey Manaj po vazhdon të jetë vendimtar për Sivasspor në futbollin turk. Sulmuesi i Kombëtares shqiptare shkëlqeu në fitoren 4-1 ndaj Sakaryaspor, duke kontribuar me një gol dhe një asist.
Ndeshja nisi në mënyrën më të mirë për Sivassporin, pasi në minutën e 6-të Manaj shërbeu saktë për bashkëkombësin e tij Valon Et'hemi, i cili zhbllokoi rezultatin dhe i dha avantazhin skuadrës mike. Et’hemi nuk u mjaftua me kaq, pasi realizoi edhe një gol tjetër gjatë takimit, duke kompletuar dopietën personale.
Në minutat shtesë, ishte sërish radha e Manajt për të lënë gjurmë. Në të 92-ën, ai gjeti rrugën e rrjetës dhe vulosi përfundimisht rezultatin 4-1, duke konfirmuar një paraqitje të plotë dhe vendimtare.
Sivasspor, që militon në Ligën e Parë Turke, pas kësaj fitoreje ngjitet në kuotën e 35 pikëve dhe renditet në vendin e 14-të pas 27 javësh kampionat, ndërsa forma e mirë e Manajt mbetet një sinjal pozitiv edhe për Kombëtaren shqiptare.
