Një ngjarje e rëndë ka tronditur qytetin e Kavajës pasditen e kësaj të shtune, ku një 47-vjeçar ka humbur jetën pasi është goditur me mjet prerës. Sipas policisë, rreth orës 14:22 në lagjen nr. 3, shtetasi R. P., dyshohet se ka sulmuar me thikë shtetasin S. I., i cili ka ndërruar jetë në spital si pasojë e plagëve.
Autoritetet kanë nisur menjëherë ndjekjen e autorit, ndërsa grupi hetimor, nën drejtimin e Prokurorisë, po punon në vendngjarje për të sqaruar rrethanat e ngjarjes dhe për të dokumentuar ligjërisht rastin. Policia bën apel për çdo qytetar që ka informacion për ngjarjen të kontaktojë menjëherë, ndërsa hetimet për kapjen e autorit dhe zbardhjen e plotë të motivit të sulmit vazhdojnë intensivisht.
