Hetimet në lidhje me koncesionet në fushën e shëndetësisë janë zgjeruar dhe kanë përfshirë biznesmenin Klodian Allajbeu. SPAK dhe BKH kanë kryer sekuestrime në ambientet e shoqërisë “Evita” sh.p.k., kompani në pronësi të Allajbeut e lidhur me Spitali Amerikan, si dhe në kompleksin 'Equos Resort' dhe kompaninë 'Pegasus' të biznesmenit Janis Karathanos. Pegasus është shoqëria mëmë e AB Laboratory Solution BV. Pas sekuestrimeve, disa shoqëri tregtare kanë kërkuar në GJKKO kthimin e sendeve të sekuestruara, vendim për të cilin do të japë gjyqtarja Elsa Ulliri.
Sipas dokumenteve të siguruara nga WebLajm, prokurorja Dorina Bejko ka urdhëruar gjithashtu kontrolle personale për tre persona të tjerë: Osvelda Qafa, Shefe e Operacioneve Financiare në Spitalin Amerikan, si dhe çiftin e bashkëshortëve Onejda Ymeraj dhe Arbër Teqja. Ymeraj është një prej drejtuesve kryesorë të Spitalit Amerikan që prej vitit 2014, ndërsa Teqja ka qenë më parë pronar me 70% të aksioneve të kompanisë “Eco Riciklim”, që më pas iu shit Allajbeut përmes kompanisë ANAMARK. Qafa, Ymeraj dhe Teqja kërkojnë në GJKKO kthimin e celularëve të sekuestruar.
Sekuestrime të tjera janë kryer edhe te kompanitë koncesionare dhe të dyshuara të lidhura, përfshirë rrjetin e laboratorëve 'Cambridge', ndërsa shoqëria “Evita” sh.p.k. vazhdon aktivitetin në sektorin e farmaceutikës dhe furnizimit me pajisje mjekësore. Hetimet po kryhen nën drejtimin e Prokurorisë së Posaçme dhe deri tani autoritetet nuk kanë dhënë detaje zyrtare mbi natyrën specifike të hetimit.
