Një 18-vjeçar është vënë nën hetim nga autoritetet italiane për dyshime se ka bashkëpunuar në vrasjen e 25-vjeçarit shqiptar Kevin Muharremi, i cili u qëllua me armë zjarri disa ditë më parë në Montecalvoli. Si autor i dyshuar kryesor mbahet në burg 20-vjeçari Renato Xyke.
Sipas dëshmisë së 18-vjeçarit, ai ndodhej në sediljen e pasagjerit të një “Range Rover Evoque” që drejtohej nga Xyke në momentin kur u qëllua. I riu ka pranuar se ishte i pranishëm gjatë ngjarjes, por ka mohuar të ketë pasur dijeni për armën – një pistoletë gjysmë-automatike “Beretta” e kalibrit 7.65 – e cila u gjet më pas nga policia pranë banesës së 20-vjeçarit në Montecalvoli. Nga hetimet rezulton se arma mbahej pa leje.
Në automjet ndodhej edhe një i mitur në sediljen e pasme, duke e çuar në tre numrin e personave që udhëtonin me SUV-në. Ndërkohë, në një “Fiat Doblò” të bardhë lëviznin tre persona të tjerë, mes tyre edhe viktima.
Hetuesit dyshojnë se përplasja mes dy grupeve kishte nisur disa orë më herët në një pub të zonës dhe kishte vijuar në parking, për t’u përshkallëzuar më pas në rrugë. Sipas rindërtimit paraprak, gjatë lëvizjes së mjeteve, 20-vjeçari dyshohet se e përplasi qëllimisht Muharremin dhe më pas hapi zjarr. Viktima u godit nga të paktën tre plumba, nga gjithsej pesë të shtëna.
Gjykata ka lënë në fuqi masën e arrestit për Renato Xyke, i cili akuzohet për vrasje me dashje. Prokuroria e Pisa ka nisur një hetim të thelluar, duke analizuar pamjet e kamerave të sigurisë, duke marrë në pyetje dëshmitarë dhe duke verifikuar komunikimet telefonike mes të rinjve. Sekuestrimi i armës dhe grumbullimi i provave të tjera pritet të plotësojnë dosjen, ndërsa në vijim do të merret në pyetje edhe i arrestuari.
