Nga një mbrëmje që nisi me dominim, në një makth që mund të kushtojë titullin. Barcelona ka pësuar një goditje të rëndë në transfertën ndaj Gironës, duke u mposhtur 2-1 në një ndeshje ku shpërdorimi i rasteve dhe brishtësia mbrojtëse u kthyen në "bumerang". Kjo disfatë jo vetëm që i zbret "Blaugranët" në vendin e dytë, por konfirmon një krizë besimi që po trondit ambientin katalanas.
Ndeshja nisi me një ritëm mbytës nga djemtë e Hansi Flick. Lamine Yamal ishte një rrezik konstant, por talenti 17-vjeçar dështoi të konkretizonte në situatën një kundër një në minutën e 18-të, ku humbi penalltinë. Fati i ktheu shpinën Barcelonës edhe kur Raphinha goditi traversën, por pika e kthesës ishte penalltia e humbur nga Yamal. Me tre 11-metërsha të gabuar këtë sezon, Barcelona po vuan nga një "mali" psikologjik që po u kushton pikë të arta.
Goli i Pau Cubarsí në minutën e 58-të, pas një asisti perfekt nga Koundé, dukej se do të rikthente qetësinë. Por, në vend që të mbyllnin ndeshjen, katalanasit pësuan një "blackout" total. Thomas Lemar ndëshkoi përgjumjen e mbrojtjes për barazimin, ndërsa në minutën e 87-të, Fran Beltrán "ngriu" stolin e Barcelonës me një goditje kirurgjikale që vulosi përmbysjen.
Robert Lewandowski mendoi se shpëtoi një pikë në sekondat e fundit, por VAR-i konfirmoi pozicionin jashtë loje, duke ua lënë festën vendësve. Kjo disfatë vjen si një "shuplakë" pasuese pas turpërimit 4-0 nga Atletico Madrid në Kupën e Mbretit.
Bilanci i javës: Real Madrid nuk gabon ndaj Valencias (4-1) dhe merr zyrtarisht komandën e kampionatit. Me dy humbje radhazi dhe një mbrojtje që rrjedh nga të gjitha anët, pyetja që mundon tifozët është e thjeshtë: A po shkërmoqet Barcelona në momentin më vendimtar të sezonit?
