Një video virale nga Kina ka “çmendur” rrjetin: një robot humanoid kryen salto, 'goditje fluturuese' dhe lëvizje që duken si skena nga një film kung fu. Por ky spektakël nuk është krijuar për luftë, është një test i pastër teknologjik.
Roboti është pjesë e linjës së zhvilluar nga kompania kineze AgiBot, me bazë në Shanghai, e njohur për prodhimin e humanoidëve të projektuar për mjedise reale, si guida muzeumesh dhe shërbime publike. Videoja ka ndezur debat online mes entuziastëve të teknologjisë dhe skeptikëve që mendojnë se lëvizjet janë thjesht të programuara.
Jo për betejë, por për stabilitet: Lëvizjet e frymëzuara nga artet marciale përdoren për të testuar balancën dhe reagimin ndaj ngarkesave. Këto prova ndihmojnë inxhinierët të përmirësojnë koordinimin dhe kontrollin trupor, elementë thelbësorë për robotët që duhet të lëvizin në mjedise reale dhe të paparashikueshme.
Zhvillime të mëparshme: Një model tjetër i kompanisë, A2, ka arritur madje një rekord Guinness për marshim 100 kilometra, duke treguar se këta robotë po dalin gjithnjë e më shumë nga laboratorët drejt përdorimit praktik.
Megjithëse pamjet duken si nga një film aksioni, ekspertët theksojnë se bëhet fjalë për testim të performancës motorike në lëvizje komplekse, një hap tjetër drejt robotëve që në të ardhmen mund të asistojnë njerëzit në hapësira publike dhe mjedise interaktive.
