Një skandal i rëndë i fshehjes së informacionit mbi shëndetin publik ka shpërthyer në kryeqytet, duke vënë drejtpërdrejt në akuzë Ministren e Shëndetësisë, Evis Sala. Ndërsa institucionet që ajo drejton mohuan publikisht çdo vatër infeksioni, një procesverbal zyrtar vërteton se një kopsht në Tiranë u izolua në fshehtësi të plotë.
Vetëm pak ditë më parë, Ministria e Shëndetësisë dhe Mbrojtjes Sociale publikoi një njoftim zyrtar ku thuhej prerë: "Nuk ka asnjë shpërthim të fruthit në asnjë kopsht të Tiranës". Duke i cilësuar raportimet mediatike si "informacione të pasakta që krijojnë panik", ISHP u bëri thirrje prindërve të informoheshin vetëm nga burime zyrtare.
Megjithatë, burimet zyrtare duket se kanë zgjedhur të fshehin të vërtetën. Në një kopsht jo publik te Rruga e Kavajës, më datë 12 janar 2026, u konstatuan 5 deri në 6 fëmijë të pavaksinuar të infektuar me fruth.
Ndryshe nga pretendimet për transparencë, epidemiologët e Tiranës kanë ndërhyrë në terren dhe kanë vendosur karantinimin e kopshtit për 21 ditë. Ky fakt vërtetohet nga një procesverbal zyrtar i datës 12 janar, i cili disponohet si nga administratorët e kopshtit, ashtu edhe nga Drejtoria e Shëndetit Publik.
Pavarësisht ekzistencës së këtij dokumenti, Ministrja Evis Sala dhe ISHP kanë zgjedhur ta mohojnë hapur vatrën, duke rrezikuar shëndetin e fëmijëve të tjerë për të shpëtuar imazhin politik të institucionit.
Fshehja e vatrave të infeksionit është një akt i papërgjegjshëm që cenon sigurinë kombëtare shëndetësore.
Ky skandal tregon se nën drejtimin e Evis Salës, prioriteti i Ministrisë së Shëndetësisë nuk është informimi i saktë i qytetarëve, por fshehja e fakteve komprometuese. Kur institucionet shëndetësore kthehen në zyra propagande që mohojnë dokumentet e tyre, besimi publik shembet i pari, pasuar nga rreziku që u kanoset fëmijëve të papërgatitur ndaj virusit.
